論盡回顧 2022 各傳媒冠軍歌 vs 唱片公司 小統計


論盡回顧 2022 各傳媒冠軍歌 vs 唱片公司 小統計

成日都會有人話:「邊個台個榜已經同邊間唱片公司聯盟一樣啦!」咁究竟響 2022 年 1 月 1 號至 12 月 31 號期間,五間傳統傳媒榜單中,邊啲唱片佔有最多冠軍歌呢?而家一齊睇睇。
(電台有 53 星期,電視台因 2023 年 1 月 1 號公佈新榜單而得 52 星期)

叱咤903 – 903 專業推介:
寰亞 11
大國文化 11
華納 8
頭三位相對明顯,因為第四位已經得 4 首冠軍歌,同前三相距一截。而寰亞 11 個星期中,有 6 星期係 903DJ 主唱成為冠軍 (林海峰 + 艾粒 各三星期)。全年 53 星期合共有 14 間唱片公司得過冠軍作品,當中 淺白本部 (謝安琪) 以及 Strawberry Fields (方皓玟) 只響呢個台得到冠軍歌。

香港電台第二台 – 中文歌曲龍虎榜:
環球 10
華納 9
英皇 8
傳統大公司相對佔優,就算第四都係 TVB Music Group 嘅 7 星期同寰亞 6 星期。全年 53 星期合共有 12 間唱片公司得過冠軍作品,不過究竟有幾多歌他台冠軍歌,響呢個台過唔到審核就不得而知啦。而響呢個台獨佔冠軍歌嘅唱片公司就有 元宇宙文化 (陳曉東)、晧星文化 (關心妍) 以及 Focus Music (劉德華 x 易烊千璽)。

新城知訊台 – 勁爆本地榜:
環球 10
Sony 8
大國文化 8
頭三位加上其後三位 (英皇 7 星期 / 華納寰亞各 6 星期) 後,已經瓜分全年 45 星期冠軍歌位置,以致全年 53 星期就只有 10 間唱片公司得過冠軍作品。特別在,早前有買節目時段嘅臻世唱片,憑施匡翹於呢個榜得到全年唯一一次冠軍,但節目已經完結,明年…

ViuTV – Chill Club 推介榜
華納 13
寰亞 7
大國文化 6
當你以為自己人會好多時,反而華納佔左全年 1/4 冠軍位,第二同第三加埋先等於佢地嘅成績,相信令好多人跌眼鏡。而全年 52 星期入面,有 17 間唱片公司得過冠軍,係五個傳媒之中最多。而 Smallmslam (林二汶)、JUST KIDDING (Tyson Yoshi)、Mars Music (ToNick)、WOW Music (周國賢)、Roots Agency (岑寧兒) 以及 Dystoland (per se) 都只響呢個榜單得到冠軍歌。

TVB – 勁歌金榜
TVB Music Group 22
英皇 7
環球 / 華納 / 寰亞 6
可能你都預左係呢個結果,咁都應該係不負眾望 (? 全年 52 星期中只有 7 間唱片公司得過冠軍,上面都列左五間,不妨寫埋最後兩間,分別係 Sony 3 星期以及奇蹟娛樂 (Supper Moment) 2 星期。而呢個榜係今年唯一一個有雙週冠軍歌嘅榜單,而且有 4 首,分別係 原來談戀愛是這麼一回事 (姚焯菲 – 2021-22 跨年)、焰 (炎明熹)、明天仍要繼續 (譚詠麟、炎明熹) 以及 隨意瞞 (菊梓喬)。

睇完呢個回顧後,有無令你睇到啲咩又或者諗到啲咩呢?不過可能放響心就好,亂講野一陣收律師信就唔好啦 😂 論盡回顧今年就回顧到呢度,多謝大家收睇。密切留意已經開始咗嘅「論盡年結 2022」,睇下我嘅年度心水選擇同你地又一唔一樣啦!