主持台慶成絕響? ── 鄭裕玲不再與無綫續約

主持台慶成絕響? ── 鄭裕玲不再與無綫續約

身在歐洲,一覺醒來,見到手機屏幕顯示朋友傳來的短訊:「Do姐唔續TVB,而家喺《口水多過浪花》開咪講!」

_

唔係呱,咁大件事?立即成個彈起,隨即問另一位朋友,對方秒回:「係呀,真係走!」

_

坦白講,以往不是沒有想像過這個情況出現,只是真的變成事實後,又會覺得有少少超現實。

_

香港時間周五(10月21日)下午,Do姐於商台開咪主持節目《口水多過浪花》期間承認與無綫電視結束賓主關係。

_

「我服務咗TVB 44年,到續約嘅時間,我就決定唔續約。咁點解呢?本來呢件係好小嘅事,合約滿喇唔續約,但到底喺呢間機構44年,點解唔續約呢,為免令大家有誤傳,亦知道有好多朋友關心我,不如我自己講一次。」

_

Do姐表示,一場世紀疫症,加上近年身邊有很多人離世,令她下定決心要向外闖。「其實呢三年嘅疫情對大家唔多唔少心態上係會有啲唔同,諗嘅嘢會唔同咗嘅。我同TVB嘅合約都咁耐啦,雖然佢對我哋……對我好好,有時啲節目我覺得唔適合,我可以同佢哋講我唔做,但到底你都係同一間公司簽咗約,始終有Obligation(義務)要完成。

_

「我成日喺節目度講,成日冇得去旅行,依家可以去旅行,你都唔可以係想玩幾耐就幾耐,你都要返嚟,如果佢話有節目叫我返嚟做,因為合約精神,我都要返去做嘅。我體驗咗三年,又簽咗同一間公司咁耐,唔知自由身嘅感覺係點。咁啱合約滿,就不如試吓做自由身啦﹗」

_

Do姐強調今次與無綫是「快樂分手」,留痕不留恨。「我同高層傾,佢都問咗我幾次,我哋係開心嘅,佢話:『有嘢一定會搵你幫手』,並冇話乜嘢唔開心。」畢竟在大台打滾44年,余德丞問可有掙扎時,Do姐說:「有冇唔捨得呢?當然係有嘅,有好多工作人員、藝人同事,我都會掛住佢哋,但並唔係話永遠都唔見面,頭先我都講咗,如果有合作嘅可能,仍然都會返去。」適逢無綫今年55周年台慶,身為《萬千星輝賀台慶》和《萬千星輝頒獎典禮》台柱的Do姐,到底會否在節目亮相?她沒有具體交代,但指自己正積極計劃外遊,「依家計劃緊等緊0加0,如果未得就去啲短期先。」

_

對於日後發展,Do姐說仍會繼續在商台開咪,「我依家好鍾意做訪問,可以見到好多唔同嘅人,增進知識。」又指自己「Open to all kinds of嚟緊嘅工作」,但不再跟任何公司簽長約︰「我好多嘢未試過,所以唔排除一切合作嘅可能性。同邊間機構又好,做啲乜嘢又好,所有嘢都會考慮,我想試新嘢。喺TVB做咗咁耐,喺出面有冇啲乜嘢Possibility我未試過嘅呢,所以喺度賣個廣告,有啲乜嘢工作,就唔該你DM去我嘅IG。乜嘢都可以傾,演唱會我唔得啦。」最後Do姐點播Rod Stewart的《Thanks for the Memory》憑歌寄意。

_

1978年8月佳藝電視倒閉後,當時Do姐原本拍攝長劇《名流情史》(飾演張海華)和武俠劇《金刀情俠》(飾演丁靈琳),結果霎時失業,幸得方逸華招手過檔,加盟無綫後,Do姐第一個節目是夥拍譚詠麟和林子祥主持《Bang Bang咁嘅聲》,同年年底參演甘國亮監製和編導劇集《孖生姊妹》,之後憑《網中人》(1979)一劇,躍升成為當家花旦。