本地EVA迷望穿秋水，《新世紀福音戰士新劇場版：終》終於在港上映(而且有MX4D版！)。記得去年大家看Amazon Prime Video的台灣翻譯時個個叫苦連天，今期帶大家認識由2007年《序》到2022年《終》都是由她翻譯的本地功臣：Peggy Tang。
1. 第一次接觸《EVA》翻譯工作的契機？
一次工作遇上電影公司老闆阿Cat，有機會入行翻譯電影。由最初嘅《蠟筆小新》系列、「細田守執導」系列，同埋《福音戰士新劇場版》系列，都係不可多得嘅大作。
2. 翻譯《EVA》有甚麼難度？
最難搞都係啲詞彙。本身源自聖經故事有得搵源頭還好，如果係佢自創嗰啲又要作個中文term出嚟有時候都諗到頭都大。
3. 今次能夠翻譯《終》有甚麼感想？
估唔到《終》真係可以響戲院上映，隔咗咁耐都上返，呢間電影公司係有heart嘅。呢集亦係系列中最長一集，故事解釋得超級詳細，理論上亦係打得最多字嘅一套，但感覺好似都只係一剎那嘅事咁。
4. 作為日語老師、翻譯家及動漫迷，你可否分享對《EVA》的鍾愛程度？
《EVA》係一套有好多對人生投射與反思嘅作品，當中好多地方都同青春期時代嘅我好接近，好有共鳴。如果要計，《EVA》應該係我鍾意嘅動畫/漫畫作品頭10位吧。
5. 自己最喜愛哪個角色？為甚麼？
睇完《終》嘅話，我最鍾意真理，因為佢係真正拯救碇真嗣嘅人，亦係最有耐性等待碇真嗣成為一個真男人嘅人。原來真係有人比綾波麗更美好，真理名副其實係個玲瓏浮突好女人。
6. 你對庵野秀明有甚麼感受？
好叻好叻嘅人，有才華、有理想、有實行力，仲有個又靚又有才華嘅好老婆(其實我鍾意佢老婆作品多啲)。祝福佢哋永遠幸福快樂。
7. 如何看待《福音戰士新劇場版》？
我從來唔認同「作品一定要觀眾睇得明」，所以好多人投訴話TV版睇唔明，其實唔明咪唔明囉。至於《新劇場版》係有史以來最容易入口版本：作畫特效音樂聲效戰鬥場面全部升級，故事直白咗，人物描寫更完整，應該再冇理由投訴啦啩？
8. 《終》最難忘的情節或場景是？
綾波麗響真嗣眼前消失嗰一幕。睇咗兩次都係喊咗，擺明來討眼淚嘅一幕。
9. 從2007年《序》到2022年《終》，你對這項長達15年的工作有甚麼感想？
終於完反而冇咩感想。首先我都係有戲就譯，冇乜過咗15年嘅感覺，每一次全力做好當下，就係我唯一可以做嘅事。同埋我一直只覺得自己係成個project嘅一粒小部件，因為做呢個工作而有人提起/記得自己，已經賺突咗啦。
而且呢一集了結得好圓滿冇爛尾不突止，仲有少少令我對真嗣改觀，我自己睇完都冇遺憾了。舊嘅唔去新嘅唔嚟，庵野同佢嘅夥伴們終於唔使再俾人話佢EVA都未埋尾就開新project，可以更自由地去做想做嘅事。試問對創作人而言，有乜嘢幸福得過咁樣呢？
10. 期望觀眾抱著甚麼心態欣賞你的翻譯？
哇，千祁唔好咁講！！大家係入場欣賞部電影，電影先至係主角。睇完嗰陣唔好咁早走，記住聽埋宇多田光兩隻主題曲先。
